Liebe Noah!
De Götti wünscht dir zu dim Geburtstag alles Gueti! Damit du gsesch, wie’s bi eus usgseht, hätt de Götti no es paar Bildli iigfüegt.
So gseht z’Taiwan e chile us. Die sind da ganz farbig und händ ganz vill Dräche ufem Tach.
Das isch es Stadttor. Riesegrooss und au mit allerlei Figure ufem Tach.
Das links isch de Götti und das rächts isch d’Sibil.
De Götti bim Eier poschte: Eier wärdet da eifach i grooosse Chischte häregschtellt. Me chunnt dänn en Sack über mitere Ziitig unedrin und leit eifach so viel Eier drii, wie mer bruuucht. Natürli hätt de Götti no e Eierschachtle debii gha… 🙂
Da hätt’s au ganz luschtigi Fahrzüüg ume. Das isch so öppis ähnlichs wie en Laschtwage.
Das isch im Gägesatz wider hüpermodern! En ganz en schnälle Zug hät’s da au.
Das isch en ganz en sältene Vogel wo’s da git. Er heisst Schwarzgsichtlöffelschnabel. (Oder uf hochtüütsch: Schwarzstirnlöffler).
Die Schildchrotte händ ali wele ade Sunne sii. Und drum händ sie sich grad ufenand uegstaplet, will’s nöd so vill Platz gha hät.
Das isch au e luschtigs Tier. Es Kunschtwärch, wo mir imene Park gseh händ.
Das sind gfalteti Wäschlümpe, wo usgsehnt wie Affe!
Das Bild hätt euse Fründ Jeff us Taiwan gmalet.
Und das au. De Götti findet das uuuschön.
Das Büsi git’s da ganz vill. Und es isch eigetlich es Maneki-neko und chunt us Japan bzw. us China. Das tuet mer imene Lade ufstelle und das Büsi tuet dänn ganz vill Chunde aazieh.
Ganz en liebe Gruess vom Götti.
P.S. De Götti weiss natürli scho, dass es din Papi echli besser im Griff hät mit dem Webzüügs als de Götti. 🙂